Í fréttaskýringu frá 13.nóvember fer Agnes Bragadóttir blaðamaður á Morgunblaðinu yfir nýjustu fréttir af málefnum nýs Landspítala.


Gunnar Svavarsson, formaður stjórnar Nýs Landspítala, segir að áætluð verklok nýs Landspítala séu 2023.


„Áætlaður heildarkostnaður er 49 milljarðar á verðlagi frá í mars og að allar áætlanir um verklok og kostnað eru óbreyttar“, sagði Gunnar.


Gunnar segir ennfremur að kostnaðaráætlun sé reglulega uppfærð með tilliti til verðbóta.


„Öll útboð sem við höfum framkvæmt á grundvelli þessarar kostnaðaráætlunar hafa fallið þannig að það er allt verulega undir kostnaðaráætlun“, segir Gunnar.


Einnig kemur fram að kostnaðaráætlunin hafi verið rýnd bæði af innlendum og erlendum aðilum og að nú þegar sé lokið hönnun við 25% af þeim byggingum sem reisa á.


„Alls verða reist fjögur hús; sjúkrahótelið þar sem framkvæmdir eru að hefjast, meðferðarkjarninn, rannsóknahús þar sem öll rannsóknastarfsemi Landspítalans verður sameinuð í einu húsi og loks bílastæða og skrifstofubygging“, segir Gunnar að lokum.


Hér má sjá umfjöllun á mbl.is

Í Morgunblaðinu 15.8 skrifar Reynir Arngrímsson formaður Læknaráðs Landspítalans um mikilvægi samstarfs Landspítala við Háskóla Íslands.  Reynir færir rök fyrir þvi að Nýr Landspítali eigi að rísa við Hringbraut.

 „ Árið 2014 voru 1.605 nemar við nám á spítalanum. Þeir mega ekki gleymast þegar hugað er að húsnæði spítalans og skipulagi“, segir Reynir.

Brot úr grein má sjá hér:

Hljóti hugmyndir sem varpað hefur verið fram að undanförnu að flytja Landspítalann alfarið frá Hringbraut, almennan hljómgrunn verður einnig að huga að áformum um flutning heilbrigðisvísindasviðsins. Málið snýst ekki um örfáa kennara sem gætu ferðast á milli háskólasvæðis vestur í bæ og spítala í öðrum enda borgarinnar eins og fleygt hefur verið fram. Slíkt lýsir vanmati á kennsluhlutverki Landspítalans sem háskólasjúkrahúss. Málið er mun stærra í sniðum og varðar kennslu heilbrigðisstétta til framtíðar og aðstöðu ríflega 1.500 nema til náms í heilbrigðisfræðum og skyldum greinum. Í núverandi áætlunum er gert ráð fyrir að þeir hafi aðstöðu í nýju og endurbættu húsnæði heilbrigðisvísindasviðs sem hægt er að samnýta í námi þeirra innan spítalans. Allt í senn fyrirlestrasali, færnibúðir og sérhæfðar kennslustofur. Að aðskilja uppbyggingu spítalans og heilbrigðisvísindasviðsins væri óskynsamlegt og að tvístra starfseminni óheillavænlegt skref. Horfum til framtíðar.

 

Nemendur við Landspítala árið 2014 voru 1605 á mörgum námsbrautum:

Starfsnám og þjálfun Háskóli – grunnnám Háskóli - framhaldsnám
Heilbrigðisnám skipstjóra og stýrimanna Bókasafns- og upplýsingafræði Félagsráðgjöf
Heilbrigðisritaranám Geislafræði Heilbrigðisverkfræði
Sjúkraflutninganám Hjúkrunarfræði Hjúkrunarfræði
Sjúkraliðanám – grunn og framhalds Iðjuþjálfun Líf- og læknavísindi
Slysavarnarnám sjómanna Íþróttafræði Lífeindafræði
  Lífeindafræði Ljósmóðurfræði
  Lyfjafræði Lyfjafræði
  Læknisfræði Lýðheilsufræði
  Sálfræði Læknisfræði
  Sjúkraþjálfun Næringarfræði
  Uppeldisfræði Sálfræði
  Viðskiptafræði Talmeinafræði
  Þroskaþjálfun Tannlækningar