14. desember 2012

Borgarstjórn samþykkti deiliskipulagið

Borgarstjórn Reykjavíkur samþykkti tillögur að breyttu aðalskipulagi og deiliskipulagi á lóð Landspítalans við Hringbraut á aukafundi sem haldinn var í gær. Skömmu áður hafði sveitarstjórn Kjósarhrepps samþykkt skipulagið.

Undirbúningur að uppbyggingunni á lóðinni hefur staðið yfir í meira en 10 ár og fjölmargar skýrslur og úttektir verið unnar um fyrirhugaða uppbyggingu: staðsetningu, byggingamagn og umferðarmál. 
  
Málið hefur fengið viðamikla kynningu meðal almennings svo og umfjöllun í skipulagsráði.  Fjölmargar athugasemdir vegna deiliskipulagsins bárust borginni og nákvæm og ítarleg svör við öllum athugasemdum liggja nú fyrir. Borgarstjórn telur að þar sé með sannfærandi hætti sýnt fram á að staðsetning nýja spítalans sé skynsamleg, að umferðarmál séu ásættanleg og þörf á byggingarmagni vel rökstudd af uppbyggingaraðila.